भक्तपुर, साउन २९ । भक्तपुरको सल्लाघारीस्थित मोडर्न स्कूलमा संयुक्त राष्ट्रसंघको सहयोगमा दोस्रो मोडल युनाइटेड नेशन्स (MUN) सम्मेलन सफलतापूर्वक सम्पन्न भयो।
तीन दिनसम्म (साउन २३ देखि २५ गते) सञ्चालन भएको उक्त कार्यक्रममा विश्वका ज्वलन्त विषयमा कूटनीति र बहसमार्फत छलफल गर्न २०० भन्दा बढी विद्यार्थी प्रतिनिधिहरू सहभागी भएका थिए।
उद्घाटन समारोहमा मोडर्न स्कूल/कलेजका प्रिन्सिपल अनिल कासपालले MUN को महत्वबारे प्रकाश पार्दै भन्नुभयो, “मोडल युनाइटेड नेशन्स विद्यार्थीहरूका लागि अत्यन्तै लाभदायी कार्यक्रम हो। यसले केवल वक्तृत्वकला र कूटनीति मात्र होइन, दक्ष बहसकर्ता र आत्मविश्वासी नेतृत्वकर्ता पनि तयार गर्छ, जो भविष्य निर्माणमा अग्रसर हुन्छन्।”
कार्यक्रममा सम्माननीय प्रतिनिधिसभाका उपसभामुख इन्दिरा रानामगर र फोर्ब्स ३० अन्डर ३० एशियामा सूचीकृत युवा उद्यमी किरण तिम्सिनाको विशेष उपस्थितिले कार्यक्रमलाई अझ प्रेरणादायी बनाएको थियो।
प्रतिनिधिहरूले सुडान र साहेल क्षेत्रको सुरक्षा, कृत्रिम बुद्धिमत्ताबाट उत्पन्न मानवअधिकार चुनौती, प्रविधिमार्फत अन्तरदेशीय अपराध नियन्त्रण, कार्यस्थलमा लैंगिक समानता, तथा नेपालको चर्चित सामाजिक सञ्जाल विधेयक जस्ता विषयमा UN शैलीका समितिहरूमा गहिरो बहस गरेका थिए।
युवाहरूलाई सचेत र सशक्त बनाउन विद्यालयको अटूट प्रतिबद्धता प्रदर्शन गर्दै सम्पन्न भएको सम्मेलनले दुई सय सहभागीमार्फत एउटा मात्र सन्देश दिएको छ — “सहयोग र कूटनीतिक संवादमार्फत विश्वलाई एक बनाऔँ”।
